Jakob Máni Jóhannsson

www.reykjalin.blog.is, www.gummiodds.bloggar.is

Við ætlum að láta bloggið hennar mömmu og Gumma nægja í bili...

Sjáum til hvort við höldum áfram með þetta blogg síðar..

Endilega skiljið eftir athugasemdir handa mér við myndirnar á mömmu bloggi

Og það styttist...

Í dag eru rétt rúmar tvær vikur þangað til við mamma og Gummi flytjum til Bandaríkjanna. Ég er orðin rosalega spenntur en ég er samt að skemmta mér konunglega í fríinu mínu áður en við förum. Ég hætti í leikskólanum í lok júní og var þá hjá ömmu og afa á Dalvík í rúma viku. Það var mjög gaman og ég fékk m.a. að hjálpa afa við að mála húsið! Svo fór ég í nokkra daga til ömmu og afa á Hrafnagili og fékk líka að mála þar og hjálpa til í garðinum. Enda er ég ótrúlega duglegur við að aðstoða og ber nafnið "vinnumaður" með réttu!

Núna er ég búinn að vera í viku hjá pabba þar sem við njótum þess að vera í sumarbústaðnum hans í sveitinni. Ég skrifa meira um það þegar ég kem aftur heim.

je-je-je

Og þá er það ákveðið. Við flytjum til Columbia, Missouri í ágúst! Ég er orðinn spenntur, enda veit ég að það er til fullt af dóti þarna úti í USA.. ég hef séð það í sjónvarpinu hjá afa og ömmu á Dalvík á Cartoon Network! Mamma sagði mér að ég gæti ekki tekið allt dótið mitt með mér út, þannig að við ræddum um það hvað best væri að gera við það. Ég ætla nú að geyma eitthvað af því, en sumt ætla ég að tilnefna nokkrum vinum mínum. Ég er sko nú þegar farinn að ákveða hvaða dót á að fara til Róberts Mána, Valdimars Daða og Arnþórs litla frænda. Þeim finnst nefnilega svo gaman að leika sér með dót.
Svo er ég líka farinn að æfa mig í enskunni.. Yes (borið fram je, með slatta töffarahreim) og No heyrist oftast. Ég efast ekki um að restin af tungumálinu verði fljót að koma :-)
Ég er nú dálítið líkur henni mömmu, þar sem ég er ekki farinn að segja -R- ennþá en það er svosem ekkert til að hafa áhyggjur af. Samt ætla ég nú til talmeinafræðings til að ná því áður en ég flyt út þar sem ameríkanarnir nota errið svo lítið.. betra að hafa vaðið fyrir neðan sig.. Orðaforðinn hjá mér er samt alveg rosalega flottur! Stundum mætti halda að ég væri á 10. ári í stað 5. :-)

Nýja síðan mín!

Það stefnir allt í það að ég, mamma og Gummi flytjum út í haust!
Þess vegna vildum við stofna þessa síðu til þess að ég geti sagt ykkur fréttir af mér og sett inn myndir.
Mamma er búin að lofa að vera duglegri við þessa síðu heldur en hún var við barnaland.is hér forðum daga..
Meira síðar ;-)